सुख, समृद्धि र अमरत्वको कामना सबै व्यक्ति र समाजमा कुनै न कुनै रूपमा हुने रहेछ । यसैको खोजीमा जीवनचर्या, सामाजिक गतिविधि र जीवनदर्शन हुने रहेछ । यही सिलसिला आठौं शताब्दीतिर हिमालका कन्दराहरुमा संसारी दुःख भन्दा परको सुखमय गोप्य क्षेत्र रहेको भविष्यवाणी भएको रहेछ । समयक्रममा बिर्सिन पुगेका ती ‘लुकेका क्षेत्रहरु’ सन् १९६० को दशक राजनैतिक, सामाजिक उथलपुथल, कठिनाइँ आउँदा फेरि खोजिन थालिएको रहेछ । भलै ती यात्राहरु पनि रहस्यको गर्भमै फेरि हराउन पुगेका रहेछन् । हाम्रो हुम्लातिर भने गाउँघरमै अमनचैनले त्यो गोप्य क्षेत्रको विषयले त्यति महत्व पाएनछ । तर विगत केही दशकका सामाजिक, आर्थिक उथलपुथल, कलह र व्यक्तिगत जीवनका कठिनाइहरु आफंैसामु आइपुगेपछि सुख, शान्ति र अमरत्वको खोजी हामीले पनि थाल्नुपर्ने भयो । त्यही सिलसिला सामाजिक विकास, राजनैतिक परिवर्तन, भूगोलको सयर गर्दै अन्तर्मनको आरोह अवरोहहरुमा पनि पुगें । त्यसैक्रममा विगतका पाइलाहरु पछ्याउँदै, हिमालय क्षेत्रमा विरलै जानिएका पात्रहरु, तिनका ध्यान अनुभूति, जीवन, जगतका रहस्यहरू खोतल्न पुगें । त्यही क्रममा कुनै समय सुरु भइ फेरि गुमनाम बनेका अमरभूमिका बाटाहरु, पुराना पाइलाहरु पछ्याउन पुगें । तिनै वृतान्त र अनुभूतिहरु समेटेर लेखिएको हो, अमरभूमि ।